آيتن عامر لوالدها الراحل: بحبك و وحشتني و زعلانة منك
نون - شاركت الفنانة آيتن عامر مجموعة من الصور عبر حسابها الشخصي على "إنستغرام"، جمعتها بوالدها الراحل، وذلك باستخدام تقنية الذكاء الاصطناعي (AI)، التي أصبحت واحدة من أبرز الاتجاهات الرائجة على مواقع التواصل الاجتماعي في الفترة الأخيرة.
وعبّرت آيتن من خلال هذه الصور عن مشاعرها برسالة مؤثرة توجهت بها إلى والدها الراحل وقالت فيها: وحشتني اوي اوي اوي و حقيقي محتاجالك ، الدنيا مش حلوة يا بابا ولا الناس كمان ، كل مرة بتحط في اختبار صعب او ازمة مفيش حد بيجيي في دماغي غيرك ، اول واحد بيبقى نفسي اجرى عليه و اقوله الحقني بيبقى انت ، وجودك كان هيفرق اوي اوي ، يمكن عمري ما قولت ان غيابك مسببلي ازمة كبيرة ولا قولت اللى جوايا ، بس هييجي يوم و ابقى قوية كفاية اني أواجه وجع قلبي و اطلع كل الكلام اللي جوايا و مقولتهوش ، زعلانة منك في حاجات و مفتقداك في حاجات اكتر بكتير ، و متأكدة ان لو كنت موجود كنت هتبقى السند بس غيابك خلاني أنا السند لنفسي و للي جواليا كمان ، لأن فيا منك كتير خصوصا قوتك و جدعنتك مع الكل ، بس أنا تعبت من كتر القوة و زهقت مبقتش عايزة ادخل حروب و لا عايزة مشاكل ، اللي عايز يفهم حاجة يفهمها و اللي عايزة ياخد فكرة ياخدها لا هبرر ولا هدافع ، بس اتطمن بنتك بميت راجل و مهما قابلت هتفضل واقفة و راسها في السما هتاخد استراحة محارب و عمرها ما هتبدأ حروب بس دايما هتكون مستعدة و جاهزة لاي حاجة و ساعتها مش هيكون في احتمالية للخسارة . بحبك و وحشتني و زعلانة منك و مشبعتش منك و جوايا وجع كبير بس مش هقولك غير كلمة واحدة اتطمن بنتك قدها.
الترند صورة متصورتهاش دة منتشر اوي اليومين دول و اول ما السوشيال ميديا تيم بعتولى الصورة لقتنى بكتب كلام كتير من قلبي و جوايا اكتر من كدة مليون مرة و عندي صور كتير اوي ناقصها وجود بابا حقيقي.
اسفة لو طولت عليكوا شكلي فضفضت اوي.
